Related Articles
Kalaymyo, San Myo veng mawtaw lampi ah bike aa citmi pahnih chung in hmaihuh he a um pakhat cu meithal aa tlaihmi minung paruk he kahdohnak a chuak tiah tuzing suimilam 10:00 AM hrawngah thawng theih a si. A tu an kahmi pa hi SAC ralhraang bawmtu Pyusawthi lutlai U Chian Myint Aung a si tiah a chim mi le a ttialmi zong an um nain Zalen News nih cun fehternak kan tuah kho rih lo tiah Zalen nih a langhter.
Kah a tongmi pa a ruak cu Social Welfare Association nih sizung ah an kalpi. An i kah lio a hmu mi pakhat nih a chim mi cu “pumh ka chuah in lamkam ah bike tluk thawng ka theih i bawmh ding in ka va kal asinain meithal ai kenmi minung paruk nih lam an ka kham. Meithal ai tlaihmi pakhat nih kal hlah a ka ti caah ka kir tthan. Lam cung ah pa pakhat cu cawl loin a um i pakhat cu lamcung ah a tthu kho” tiah a chim. Meithal ai kenmi vialte cu Mask (hmaihuh) an i huh dih tiah theih a si. Hi thah a tongmi pa hi Khit Thit nih cun tlaihhrem a hmangmi, thilfir zong a hmangmi a si tiah a langhter.
Cun Khit Thit nih a langhter ning ahcun a that tu phu hna hi Tualchung hriamtlai an si tiah a a langhter chap. March 03 zaanlei sang Kalay Myo Tahan veng ah pa pakhat bike a mongh lio ah an kah tiah thawng kan theih, cu pa cu micheu nih cun dalaan zong a si i ramdang lei thil kuatnak i rian a ttuanmi zong a si tiah a chim mi zong an um. Nizaan March 04 ah Nyaung Pyithai veng um mi ralhraang lei ttang pakhat zong thah a si tiah Operation Momo nih a langhter.
